View larger
„ტყე სიზმარი” ბოტანიკურ ბაღსა და სკოლაში
= დეტალები =
.jpeg)
„ტყე სიზმარი” ბოტანიკურ ბაღსა და სკოლაში
მუსიკოსმა ნინო დავაძემ, რომელიც თბბილისის საჯარო ხელოვნების ფონდის მიერ გამოცხადებულ კონკურსის „მეტრო რუსთაველი: ესკალატორი“ ერთ-ერთი გამარჯვებულია ნამუშევრით „ტყე სიზმარი“, 150-ე საჯარო სკოლის მოსწავლეებისთვის სამუშაო შეხვედრების სერია ჩაატარა. მის ნამუშევარში ტყეებისა და დაცული ტერიტორიების, ჩიტების, მწერების - ბუნების ხმები ერთმანეთს ერწყმის. სმენის გამოცდილებასა და სხვადასხვა ხმის ჩანაწერების შეგროვებაზე ააგო მუსიკოსმა საგანმანათლებლო პროგრამაც, რომელიც თბილისის 150-ე საჯარო სკოლასა და თბილისის ბოტანიკურ ბაღში, საბაზო საფეხურის მოსწავლეებისთვის ჩატარდა.
როგორც სხვა ვორკშოპების შედეგად, მოსწავლეებმა მუსიკოსის ნამუშევარი გაიცნეს და ამავე დროს, ავტორის შემოქმედებითი მეთოდების შესწავლისა და გამოყენების შესაძლებლობაც მიეცათ. მოსწავლეებმა სკოლის მუსიკის მასწავლებელთან და მუსიკოსთან ერთად ისაუბრეს ყოველდღიურ სმენით გამოცდილებებზე, კონკრეტულ ხმებთან დაკავშირებულ ემოციებზე, ქალაქისა და ბუნების ხმის განსხვავებებზე. პრაქტიკული მუშაობის ადგილად ბოტანიკური ბაღი შეირჩა, სადაც ხმის მოსმენისა და ჩაწერის ტექნიკით მთელი დღის განმავლობაში მუშაობდა ჯგუფი. საბოლოოდ კი, სკოლაში დაბრუნებულმა მოსწავლეებმა, საველე ჩანაწერებით კომპოზიცია ააწყვეს.
საინტერესო გამოცდილებისა და კონკრეტული შემოქმედებითი და ტექნიკური პრაქტიკის გამოცდის გარდა, განსაკუთრებით მნიშვნელოვანი იყო კონკურსში გამარჯვებულ ხელოვანს, სკოლის მასწავლებლებსას და მოსწავლეებს შორის ახალი კავშირების დამყარება და ერთად ექსპერიმენტული მუშაობა.
.jpeg)
