View larger
რეპრეზენტაციის სივრცეები - ქანდაკება სკოლის გზაზე
= დეტალები =
რეპრეზენტაციის სივრცეები - ქანდაკება სკოლის გზაზე
თბილისი საჯარო ხელოვნების ფონდმა გამართა შეხვედრა თბილისის 23-ე საჯარო სკოლის საბაზო საფეხურის მოსწავლეებთან. შეხვედრის მიზანი იყო ქალაქში ნანახი ძეგლებისა და ხელოვნების სხვადასხვა ფორმების განხილვა: ქანდაკებები რომლებიც მოგვწონს, რომლებსაც ბავშვობიდანვე ვუყურებთ და თვალი გვაქვს შეჩვეული, ასევე ახალი ქანდაკებები, წარწერები ქალაქში, მათი გაჩენის მიზეზები, სკოლის გარშემო, ან უფრო შორ მარშრუტებზე ნანახი დასამახსოვრებელი კუთხეები. ვცადეთ ერთმანეთისთვის შეგვედარებინა ოფიციალური და არაოფიციალური ხელოვნების ნიმუშები, პირობები და გარემო, სადაც ხელოვნება იქმნება, ტექნიკური განხორციელების სირთულეები და იდეები, რომლებსაც ზოგჯერ მარტივად ვკითხულობთ, ზოგჯერ კი, მათ გასაშიფრად დამატებითი გზამკვლევი გვჭირდება.
თბილისის და ყოველდღიური გამოცდილებების გარდა, განხილული იყო კოლონიური პერიოდის ქანდაკების რამდენიმე მაგალითი. სხვადასხვა ეპოქაში მათ ფუნქციასა და კრიტიკის საფუძველს, წინააღმდეგობრივ და თავსმოხვეულ შინაარსებს. ბოლოს კი დროის და სივრცის ეს შრეები გიორგი ხანიაშვილის ქანდაკებას, „დროის ნაწნავებს“ დაუკავშირეთ, რომელიც სკოლასთან ახლოს, ზაარბრუკენის მოედანზე ფონდის კონკურსის შედეგად შეიქმნა.
შეხვედრების მიზანი არა უშუალოდ კონკრეტული ნამუშევრის შესახებ საუბარი, არამედ წინააღმდეგობრივ შინაარსებზე დაფიქრება და კრიტიკული მსჯელობის წახალისება იყო; - არა ნამუშევრის ფორმალურად შეფასება, არამედ ქალაქის და საჯარო ხელოვნების შესახებ სადისკუსიო სივრცის აღმოჩენა, მოზარდების აზრისა და დამოკიდებულებების გაცნობა-გაზიარება.
