კამერა ობსკურა, საჯარო სკოლა № 86 და № 87

კამერა ობსკურა ისნის რაიონის საჯარო სკოლებში

თბილისის საჯარო ხელოვნების ფონდის კონკურსში „საჯარო სივრცეში დროებითი პროექტების ხელშეწყობა, ქ. თბილისი, მეტრო 300 არაგველი, ზედა ვესტიბიული“ გამარჯვებული პროექტის „ქეთუთა ალექსი მესხიშვილი, ქართული ორნამენტი“ ფარგლებში № 86 და № 87 საჯარო სკოლების საბაზო საფეხურის მოსწავლეებისთვის ფოტოგრაფიის ვორკშოპი ჩატარდა. მეტრო 300 არაგველის ზედა ვესტიბიულის ვიტრაჟების სერიას - “ქართული ორნამენტი”, ისნის რაიონის სკოლის მოსწავლეები ხშირად ხვდებიან, ამიტომ არაფორმალური გაკვეთილებისთვის მეტროს მიმდებარე სკოლები შევარჩიეთ.

მოზარდებისთვის შედგენილი პროგრამა ფოტოგრაფმა ანა ფატლაძემ არა თემატურად, არამედ მეთოდის გამოყენებაზე ააგო. რადგან პროგრამა საბაზო საფეხურისთვის იყო განკუთვნილი, პირველი ნაწილი ხედვის ოპტიკურ, ფილოსოფიურ და ტექნიკურ საკითხებს დაეთმო; ასევე ხელოვნების გაკვეთილზე ნასწავლ ისტორიისა და თეორიის გახსენებასა და ფოტოგრაფიასთან დაკავშირებას. ვორკშოპის ავტორის პროფესიულმა, პედაგოგიურმა გამოცდილებამ და პროგრამის სტრუქტურამ ერთი შეხედვით ფართო საკითხის პრაქტიკული მაგალითით მოხელთება შეძლო და მოსწავლეების ინტერესსა და ცნობისმოყვარეობაზე იმოქმედა. დამატებით ოთახში მოწყობილმა კამერა ობსკურამ საუბრისას თეორიულად განხილული საკითხები, შეგრძნებით გამოცდილებად აქცია და მოსწავლეებისთვის პრაქტიკული სამუშაოს შთაგონებადაც იქცა.