View larger
შეხვედრა მასწავლებლებთან, საჯარო სკოლა № 58
= დეტალები =
საჯარო სივრცე და სკოლა - თბილისის ვიზუალური ხელოვნების მასწავლებლების პროგრამა
თბილისის საჯარო ხელოვნების ფონდის მიერ შედგენილმა პროგრამამ, რომელიც თბილისის ვიზუალური ხელოვნების მასწავლებლებისთვის იყო განკუთვნილი 58-ე საჯარო სკოლამ უმასპინძლა.
პროგრამის პირველი ნაწილის ფარგლებში მასწავლებლებს ფონდის მიზანი და შინაარსს, კონკურსში გამარჯვებულ ხელოვანებს, ნამუშევრებსა და საგანმანათლებლო პროგრამის პროექტებს გაეცნენ.
შეხვედრების მეორე ნაწილი საუბარსა და დისკუსიას დაეთმო. მასწავლებლებთან ერთად განხილულ იქნა თუ რა მნიშვნელობა აქვს მოსწავლეების ყოველდღიურ გამოცდილებებს - ქუჩას, უბანს, ტრანსპორტს, საჯარო ხელოვნებას, გამწვანებას, კულტურის დაწესებულებებს და ა.შ. რამდენად არის ხოლმე ქალაქში ცხოვრების გამოცდილებები, ხელოვნების გაკვეთილის თემა, რა კავშირია საგანმანათლებლო მიზნებსა და საჯარო სივრცეებს შორის, როგორია რეპრეზენტაციის სივრცეები გარშემო, როგორ აღიქვამენ ამ სივრცეებს მოსწავლეები და მასწავლებლები, როგორ შეიძლება ამ საკითხების სწავლა და სწავლება, რა დახმარება და სერვისები გაამარტივებდა ამ საქმეს და როგორი საჯარო ხელოვნება იქნებოდა სასურველი ქალაქში?
შეხვედრების დროს მოხდა საჯარო ხელოვნების თემაზე ჩატარებული გაკვეთილების, კლასგარეშე და ინტერდისციპლინური პროექტების გამოცდილების გაზიარება; ასევე ზოგადი წუხილები და პრობლემები, რომლებიც მსგავსი შინაარსების დამუშავებისას იჩენს თავს. ბოლოს საუბრების მიხედვით, თბილისის სხვადასხვა სივრცეების ფოტოებითა და დამატებითი მასალით კოლაჟები გაკეთდა.
ვიზუალური ხელოვნების მასწავლებლებს მუდმივად შეუძლიათ მიიღონ რჩევა, დახმარება ან კონსულტაცია გაკვეთილების დაგეგმვა-ჩატარებასთან დაკავშირებით, როგორც ფონდის პროექტების მიხედვით, ასევე ზოგადად საჯარო სივრცისა და ხელოვნების შესახებ. ფონდისთვის განსაკუთრებით მნიშვნელოვანია, სკოლის მასწავლებლებთან შეხვედრები, პრაქტიკის გაზიარების, უკუკავშირის მიღების, ახალი კავშირების გაბმის და მომავალში უფრო მჭიდრო თანმშრომლობისთვის.
